Morfina embotellada

A busca da emancipación, de novas experiencias ou da nudez de inhibicións de todo tipo teñen sido dende hai décadas xustificación abondo para tirar da botella por parte dos mozos á hora de se divertiren. É por iso que resulta cando menos abraiante a proliferación de discursos alarmistas sobor do botellón, dado que a comuñón alcohol-xuventude vén sendo unha constante hai tempo.

Responsos moralistas revélanse insuficientes por demais para tratar de atallar unha tendencia que, por outra banda, sábese máis que prexudicial. As consecuencias van dende as evidentes á saúde pública dos mozos e mozas, á alteración no descanso dos veciños e á pegada de destrozos na vía pública. A Administración procura fórmulas de consenso entre os que queren divertirse e os que tentan repouso nocturno. Cousa nada sinxela por outro lado, pero que distrae o verdadeiro foco de atención deste problema.
Unha circunstancia que demoniza aos mozos por parte dunha sociedade que non entende esta moda. Unha sociedade que non se decata da alteración de valores que ela mesma foi inxectando amodo de forma irreversible, e que agora se expresa con meridiana claridade a través das novas xeracións. Uns mozos que non entenden o ocio máis que como espazo para o consumo, sexa de alcohol, de sexo ou de tempo. Esquécese así a posibilidade de construír o entorno, de crear e ser libres. O cárcere dos mozos de hoxe radica en xa non ignorar onde está a porta de saída, senón nin sequera procurar buscala.

servido por mardefondo 1 comentario compártelo